Hava gjørt fýra ára sáttmála

Nýggi sáttmálin millum Fíggjarmálaráðið og Kost- og føðslufelagið er galdandi frá 1. oktober 2020 til 1. oktober 2024

Tá skrivað var undir sáttmálan. Thilda Gaardlykke, forkvinna í Kost- og føðslufelagnum, og Uni Rasmussen, landsstýrismaður í fíggjarmálum.

Mynd: Fíggjarmálaráðið

Johnsigurd Johannesen

15.03.2022 - 15:17

Fíggjarmálaráðið og Kost- og føðslufelagið hava í dag skrivað undir semju um ein fýra ára sáttmála, sum er galdandi frá 1. oktober 2020 til 1. oktober 2024.

Semingsstovnurin kom upp í sáttmálatrætuna, og legði semingsuppskot fyri partarnar, sum teir góðtóku.

Lønirnar hækka soleiðis í sáttmálaskeiðnum:

Tann 1. januar 2021 hækka lønirnar 2,05 %.
Tann 1. oktober 2021 hækka lønirnar 1,25 %.
Tann 1. oktober 2022 hækka lønirnar á stig 19 til og við stig 33 hækka 690 krónur, og lønirnar oman fyri stig 33 hækka 490 krónur. Samstundis lækkar eftirlønargjaldið úr 15,8 % niður í 15%, umframt at endalønirnar hjá ymisku útbúgvingarbólkunum og hjá leiðarum verða tillagaðar.
Tann 1. oktober 2023 hækka lønirnar við 2,75 %.

Umframt lønarbroytingarnar eru broytingar gjørdar í sáttmálunum millum partarnar, og lønartalvurnar eru broyttar, so lønargongdin hjá hvørjum útbúgvingarbólki er greitt markað, sigur Fíggjarmálaráðið.

Semjan sæst her