Seks milliónir krónur til Ukraina

Síðst í februar, stutt eftir at kreppan í Ukraina tók seg upp, sendi Reyði Krossur, við hjálp frá føroyskum vinnulívi, tvær milliónir krónur til bráðfeingis hjálparátøk í Ukraina og grannalondunum. 

Nú er avgerð tikin um at lata fýra milliónir afturat hesari upphædd til sama endamál. Sostatt hevur Reyði Krossur Føroya nú latið tilsamans seks milliónir krónur til hjálparátøk í Ukraina. Hjálparátøkini fevna eitt nú um skjól, vernd, mat, drekka, heilsutænastur og sálarligan stuðul. 

Peningurin kemur í stóran mun frá Stuðulskonsertini í mars, og er hetta tískil við góðum stuðli frá fólki og fyritøkum í Føroyum, at tað ber til at lata hesa upphæddina, sigur Reyði Krossur Føroyar í tíðindaskrivi í dag.