Samgongan hjá Macron misti meirilutan

Samgongan hjá franska forsetanum, Macron, Ensemble, misti meirilutan á tjóðartingsvalinum í gjár. Samgongan fekk 245 umboð, og tað er ikki nóg mikið fyri at varðveita meirilutan.

Tað skrivar Ritzau, sambært AFP.

Franska innanríkisráðið almannakunngjørdi úrslitið, og samgongan hjá Macron, forseta, er langt frá meirilutanum, við 245 av teimum 577 sessunum í tjóðartinginum.

Argasti kappingarneytin hjá Macron, Marine Le Pen, og hennara flokkur, Tjóðskaparlig savning, fekk 89 sessir, meir enn tíggju ferðir so nógv umboð sum nú.

Samgongan hjá Macron, sum fekk 245 sessir, hevur kortini flestar sessir í tjóðartinginum, men tríggir av ráðharrunum í stjórnini høvdu boðað frá, at teir fóru at leggja frá sær, um teir ikki vóru valdir í tjóðartingið.

Eygleiðarar siga, at tað verður torført hjá Macron, forseta, at reka politikkin, sum hann ætlaði sær, við so lítlari undirtøku.