SAS-verkfall: Óvist við Føroyaflúgvingini

Verkfall varð á middegi lýst fyri flogskiparar hjá SAS, men enn ber í smálutum ikki til at siga, hvussu flúgvingin higar verður darvað.

Kunningarleiðarin hjá SAS segði týsdagin við útvarpið, at Føroyaflúgvingin fer at verða ávirkað, men hon kundi tá ikki siga, júst hvussu.

Alexandra Lindgren Kaoujk kann í dag heldur ikki heilt neyvt siga, hvussu verður við Føroyaflúgvingini, nú teir 900 flogskipararnir fara í verkfall.

- Tað er nógv, ið vit nú skulu fáa greiðu á, og enn er ov tíðliga at siga, hvussu verður við flúgvingini til og úr Føroyum, sigur kunningarleiðarin hjá SAS við útvarpið í dag.

Eitt flogfar hjá SAS lendi á fløgvøllinum á døgurða, og sambært  yvirlitinum hjá Vága Floghavn skulu fimm flogfør lenda á flogvøllinum hesa vikuna.

Hvussu verður við teimum fimm flogførunum, ið skulu koma higar, er kortini óvist, sigur kunningarleiðarin hjá flogfelagnum.

Sambært SAS fer tað at raka 200 - 250 fráferðir og 20.000 - 30.000 ferðafólk hvønn dag, nú flogskipararnir fara í verkfall.