- Tíðindi, mentan og ítróttur
Oljuprísurin lækkar
Oljuprísurin lækkaði nógv týsdagin, og um nátturðatíð var ein tunna av olju úr Norðsjónum seld fyri góðar 102 dollarar.
Orsøkin er, at nógv bendir á búskaparliga afturgongd kring heimin, skrivar E24.
Seinastu tíðina hava sveiggini í oljuprísinum verið stór, og í gjár lækkaði hann munandi.
Tað er ikki bara oljuprísurin, sum lækkar. Talan er eisini um aðra rávøru, og tað er eisini eitt tekin um ein marknað, sum ikki torir at leggja ov nógv fyri.
Støðan í Kina er ótrygg, og har er orsøkin, at býir framvegis vera stongdir, tí korona ger um seg. Tað órógvar eisini marknaðirnar.
Partabrævamarknaðirnir kring heimin eru eisini merktir av ótryggu støðuni, og sum heild hevur tað havt við sær, at partabrøv eru lækkað í virði í ár.
Samlað er stórur ivi um gongdina í heimsbúskapinum í løtuni, tí orkuprísirnir eru høgir, inflatiónin er stór, og tað noyðir tjóðbankar og aðrar bankar at stramma pengapolitikkin.