Skaðanevndin: Skiparin á Vesturbúgvanum sovnaði

Skaðanevndin: Skiparin á Vesturbúgvanum sovnaði
Eysturbúgvin sakk, tá Vesturbúgvin rendi á, men øll manningin var bjargað
Vesturbúgvin á Havnini eftir samanstoytin við Eysturbúgvan, sum sakk.
 
27.07.2022 - 08:20

Skiparin á Vesturbúgvanum sovnaði, tá skip hansara var á samanstoytskós og rendi á Eysturbúgvan.

At skiparin svav, er tað sama sum, at eingin var á brúnni.

Skiparin sovnaði, tí hann hevði sovið ov lítið undanfarnu dagarnar, tí Vesturbúgvin var á skipasmiðju, tí tøkniligir trupulleikar vóru og soleiðis, sum vaktarhaldið var skipað.

Ávaringin á brúnni, sum skal siga frá í tílíkum støðum, var ikki tendrað.

Tað er niðurstøðan hjá donsku skaðanevndini, Den Maritime Havarikommission, sum kannaði óhappið tíðliga um morgunin 14. apríl, skírisdag, tá partrolararnir Vesturbúgvin og Eysturbúgvin stoyttu saman, og Eysturbúgvin sakk tíggju minuttir seinni á meira enn 500 metra dýpi.

Vesturbúgvin fekk lítlan skaða.

 

Øll manningin bjargað

Óhappið hendi í ein útsynning sunnan, 120 fjórðingar úr Føroyum.

Allir sjey menninir á Eysturbúgvanum vóru bjargaðir um borð á Vesturbúgvan.

Óhappið hendi, tá skipini, sum partrolaðu, skuldu knýta bæði skip í trolið. Vesturbúgvin skuldi sigla móti Eysturbúgvanum.

Skaðanevndin sigur, at skiparin á Eysturbúgvanum hevði onga orsøk til at halda, at eingin var á brúnni á Vesturbúgvanum, tí Vesturbúgvin svaraði ikki Eysturbúgvanum, tí skiparin á Vesturbúgvanum svav.

Eysturbúgvin sakk, tí sjógvur kom inn á verksmiðjudekkið.

 

Kundi kravt mannalív

Var sjógvurin bara komin í maskinrúmið og rúmini við síðuna av tí, var Eysturbúgvin ikki sokkin, sigur skaðanevndin. 

Sjóvinnustýrið sigur, at niðurstøðan hjá donsku skaðanevndini er vantandi svøvnur, ikki nóg góður agi á brúnni, og tólini á brúnni vóru ikki brúkt nóg væl.

Óhappið 14. apríl kundi í ringasta føri kravt mannalív.

Sjóvinnustýrið fer nú at tosa við reiðaríini hjá fiskiskipum, so slíkt ikki endurtekur seg.

Les frágreiðingina frá donsku skaðanevndini her.

Er kopiera
Nýggjastu sendingar í ÚV
Mánadag 24. juni
Biltúrurin 2: Koyrt verður í Sumba
176599
Mánadag 24. juni
Áki flúktaði KÍ úr FM stríðnum
177176
Mánadag 24. juni
Søgan um Hank Williams (2:8)
176855
Mánadag 24. juni
EM-tíðindi: 24. juni
177168
Mánadag 24. juni
Morgunlestur mánadagur 24. juni 2024
177126
Nýggjastu sendingar í SV
Leygardag 22. juni
Video: 5mf kvinnur, Jóansøka 2024
177125
Leygardag 22. juni
Video: 10mf, Jóansøka 2024
177123
Leygardag 22. juni
Video: 6mf_menn, Jóansøka 2024
177120