Veitingarráðstevna í Danmark fyri Ukraina

Í dag er altjóða ráðstevna fyri Ukraina á Christiansborg. Danmark er vertur saman við Stórabretlandi og Ukraina. 

24 lond eru við á ráðstevnuni.

Ukraina ráðstevna, Christiansborg

Endamálið við ráðstevnuni er at geva fíggjarliga hjálp til Ukraina.

Londini, sum eru við á ráðstevnuni, fara at skifta orð um trý øki, sigur Morten Bødskov, danskur verjumálaráðharri. 

"Útflýggjan av vápnum, venjing av ukrainsku verjuni, og hjálp til at rudda minur. Tað eru tey  trý evnini, sum eg og fleiri enn 20 starvsfelagar fara at kjakast um á Christiansborg í dag," segði Morten Bødskov

Ukraina ráðstevna, Christiansborg, Morten Bødskov

Zelenskyj setti ráðstevnuna

Forsetin í Ukraina, Volodymyr Zelenskyj, setti ráðstevnuna. Danski verjumálaráðharrin, Morten Bødskov, heldur, at tað hevur avgerandi týdning fyri ráðstevnuna, at ukrainski forsetin er við.

"Tað er ein heiður fyri Danmark og okkum, sum eru við á ráðstevnuni, at Zelenskyj er sinnaður at brúka tíð upp á at seta ráðstevnuna, ímeðan kríggið herjar. Hetta samskiftið er avgerandi," segði danski verjumálaráðharrin.

Ukraina ráðstevna, Christiansborg

Zelenskyj ávaraði í síni talu um, at tað er vandi fyri einari kjarnorkuvanlukku sum henni í Tjernobyl í 1986. Ukrainski forsetin vísti á kjarnorkuverkið Zaporizjzja í Ukraina, sum liggur í krígsherjaða partinum av Ukraina.

"Vit mugu verja Evropa móti hesi hóttan," segði Volodymyr Zelenskyj umvegsi eina videoleinkju. 

Hoyr innslag frá Kaj Joensen av Christiansborg her:

Danmark letur 820 mió. kr. afturat

Í síni talu kallaði ukrainski forsetin enn einaferð Russland fyri ein yvirgangsstat og bað um meira vápn, lóður og fíggjarligan stuðul. 

Sambært Politiken, so fer Mette Frederiksen, forsætisráðharri, at lova 820 milliónir krónur aftrat í fíggjarligari hjálp til Ukraina, peningurin skal brúkast til vápn og venjing av herinum.

Ukraina ráðstevna, Christiansborg

Londini, ið eru við, eru:

Norge, Svøríki, Ísland, Finnland, Lettland, Estland, Litava, Póland, Kekkia, Holland, Slovakia, Týskland, USA, Bulgaria, Rumenia, Japan, Avstralia, Ukraina, Stórabretland, Danmark, Frakland, Georgia, Nýsæland ogm Kanada.

Flestu londini hava sent verjumálaráðharrarnar til ráðstevnuna, men ikki øll londini. 

ES er eisini umboðað á ráðstevnuni. 

Ukraina ráðstevna, Christiansborg