Landsgrannskoðanin finst at vantandi innaneftirliti

Landsgrannskoðanin vísir á, at tað at hava ábyrgd av roknskapinum, merkir, at aðalráðini og stovnarnir undir teimum hava støðugt innanhýsis eftirlit, sum tryggjar, at ársroknskapurin er rættur, og at hann gevur eina rættvísa mynd uttan stórvegis skeivleikar.

Ein týðandi partur av innaneftirlitinum er tey tiltøk, sum leiðsla og starvsfólk seta í verk fyri at røkka málinum um, at raksturin er effektivur, at roknskapurin er rættur og álítandi, og at lógir og reglur eru hildnar.

Beinta Dam

Beinta Dam er landsgrannskoðari.

Tað hendir seg javnan, at innanhýsis eftirlitið hjá stovnum ikki er nøktandi, og tað ger, at Landsgrannskoðanin ikki kann sanna, at roknskapurin er rættur, sigur Landsgrannskoðanin.

Og aftur í hesari ársfrágreiðingini vísir Landsgrannskoðanin á vantandi eftirlit og vísir á nøkur dømi um tað.

Arbeiðs- og brunaeftirlitið

Landsgrannskoðanin sigur, at skipanin hjá Arbeiðs- og brunaeftirlitinum er viðbrekin.

Búnaðarstovan og Arbeiðs- og brunaeftirlitið

Nevnt verður, at feilir í roknskapinum fyri 2019 hjá Búnaðarstovuni kundu verið fyribyrgdir, um greiðar mannagongdir vóru viðvíkjandi inntøkum. Kanning av inntøkunum vísir, at innaneftirlitið hevur ikki verið nóg gott.

Skipanin hjá Arbeiðs- og brunaeftirlitinum er viðbrekin, við ongum ella í besta føri veikum innaneftirliti, tá ið sama starvsfólk hevur ábyrgd av at rokna prísir út, gera eftirlit og at gera fakturagrundarlagið, og tað kann vera óheppið, at stovnurin ikki hevur góðkenningarmannagongd, tá ið tey broyta prísir.

Innaneftirlitið hjá Yrkisdeplinum hevur verið veikt. Um einføld eftirlit vóru í KT-skipanini, kundu tey spart stovninum fyri nógv handligt arbeiði og byrgt upp fyri, at feilir hendu, sum t.d. at sama upphædd kann verða goldin út fleiri ferðir.

Og Landsgrannskoðanin kann ikki sanna, at roknskapirnir hjá Studna eru rættir, m.a. tí at stovnurin hevði ikki nóg væl skipað eftirlit við lestrarvirkni, stendur m.a. um vantandi innaneftirlit á stovnum.