Jana til bestu donsku deildina

Evnaríki bakspælarin úr H71, Jana Mittún, skal spæla við Viborg HK í bestu donsku hondbóltsdeildini næsta kappingarár.

 - Tað er dreymurin hjá mær at sleppa at royna at fara “all-in” sum hondbóltsspælari, sigur hon við heimasíðuna hjá H71.

Jana Mittún hevur skrivað undir trý ára sáttmála, og í fyrstu syftu skal hon spæla hondbólt fulla tíð.

Byggja upp av nýggjum

Jana Mittún, sum er kend fyri sítt góða og kvika gjøgnumbrotsspæl, fer til eitt felag, sum er farið undir at byggja nýtt lið upp.

Tað er partur av orsøkini til, at hon hevur valt júst Viborg, tí onnur feløg lógu eisini framvið.

 - Eg síggi tað avgjørt sum ein fyrimun at gerast partur av nøkrum, sum verður bygt upp, og í øllum førum eri eg spent at sleppa at royna meg sum hondbóltsspælari fulla tíð, sigur hon.

 - Tað er dreymurin hjá mær, at sleppa at royna at fara 'all-in' sum hondbóltsspælari, sigur hon.

Jana Mittún fer at spæla við H71 alt hetta kappingarárið og verður eins og áður ein av lyklaspælarunum hjá hoyvíkingunum.