Fuglakrím um allar Føroyar

Øll, sum eiga flogfenað, skulu nú vísa serliga ans við sínum fuglum, aftaná at fuglakrím er staðfest í bæði villum fugli og heimafugli í Føroyum.

Allar Føroyar eru nú roknaðar sum ein sona, boðar Heilsufrøðiliga Starvsstovan frá.

- Av tí at fuglakrím er ein so álvarslig sjúka hjá fugli, og at ein ávísur, men tíbetur sera lítil, vandi er fyri, at fólk eisini kunnu smittast, er avgerð tikin um at gera alt landið til eina sonu har sum eigarar av flogfenaði skulu vera sera ansnir við sínum fugli. Eisini verður heitt á almenningin, sum heild, at vera gáin í náttúruni, skrivar Heilsufrøðiliga Starvsstovan. 

Higartil hevur sjúkan ikki verið atvold til álvarsama sjúku hjá fólki, men fuglakrím er staðfest í fleiri villum fuglasløgum, og er talan um smittu kring alt landið. 

Fyri at tálma smittuni mælir myndugleikin til sjey fyrilit, sum eigarar av flogfenaði skulu hava:

- Djóraeigarar skulu hava eitt serliga vakið eiga við fuglunum fyri at varnast, um fuglarnir síggja út til at vera sjúkir
- Gev Heilsufrøðiligu starvsstovuni boð, um fuglurin gerst sjúkur ella doyr
- Livandi fuglur skal ikki flytast ímillum ymisk djórahald
- Fóðra heimafuglin innandura, undir taki ella ver hjá til fuglurin er liðugur at eta
- Lat vera við at fóðra villan fugl
- Reinsa fótbúnaðin
- Minka um sambandið millum heimafugl og villan fugl

Heitt verður eisini á almenningin um at siga frá, um komið verður fram á sjúkan ella deyðan fugl. Serliga um talan er um rovfugl ella heimafugl. 

Vegna smittuvanda verða fólk biðin um ikki at nerta við sjúkan ella deyðan fugl.