Steingja vegin um Eiðisskarð um veturin

Vegurin um Eiðisskarð er nú stongdur um veturin fyri almennari ferðslu.

Vegurin er stongdur frá 1. oktober til 1. mai.

Undantikin er koyring hjá Vitatænastuni og røktingarfólki.

Renna seg fastar í kavanum

Orsøkin er, at vegurin verður ikki saltaður ella ruddaður fyri kava, sigur Landsverk, sum hevur tikið avgerðina um at steingja vegin saman við løgregluni.

Landsverk sigur, at bæði persónbilar og bussar hava rent seg fastar í kavanum og í hálkuni, hóast ávaringarskelti um, at einki vetrarhald er. 

Hendir eitt ferðsluóhapp á vegnum, er sera torført at koma til hjálpar, tí vegurin er so smalur, og arbeiðsumstøðurnar hjá Landsverki og átakseindunum eru vánaligar, sigur Landsverk.