Skjótari at avgreiða ferðafólk í bretskum floghavnum

Í hesum hátøkniligu tíðum er ein forðing, sum ikki rættiliga er loyst enn. Tað er, tá fólk skulu trygdarkannast, áðrenn tey fara inn á ein altjóða flogvøll.

Men nú røkist fyri, at fólk í framtíðini sleppa undan av taka elektroniska útgerð úr taskuni ella kuffertinum, og at leggja løg fyri seg.

Nýggir 3D-skannarar eru mentir, og NRK skrivar, at myndugleikarnir í Bretlandi, sum teir fyrstu, hava heitt á allar flogvøllir í landinum um at fáa sær hesar nýggju skannarar í seinasta lagi í 2024, so fólk kunnu leggja viðføri sítt beint á bandið.

Hetta, at fólk skulu leggja teldur og løg fyri seg, tá tey fara gjøgnum trygdareftirlitið, er størsta orsøk til seinkingar og bíðirøðir á altjóða flogvøllum.