Rognkelsi trívist best í tara

Í verkætlanini hevur Malan kannað 16 ymiskar fjørur fyri at vita, hvat lív var at finna og um rognkelsi livdu har, upplýsir Fiskaaling. 

Kanningarnar vórðu gjørdar árið runt og kring alt landið. 

Høvuðsniðurstøðurnar í ritgerðini eru, at fyri at rognkelsi skulu trívast, má tari við passaligari flatu vera tøkur at sita á. Hetta er til dømis sukurtari og tarablað.

Somuleiðis ber til at finna smá rognkelsi har skúvtari er til staðar, meðan størri rognkelsi eru ikki, har skúvtari er.

Skilja og betra umstøður
Eingin greiður samanhangur var millum onnur djórasløg, sum liva í taranum, og so rognkelsi.

- Vitanin, sum er komin burtur úr hesi verkætlan er týðandi, tá metast skal um grundleggjandi tørv og liviumstøður hjá rognkelsi, sigur Ása Johannesen, granskari í fiskaatferð og fiskavælferð.

- Hetta er vitan sum kann nýtast í arbeiðinum at skilja og betra um liviumstøður hjá rognkelsi, sum verða brúkt í alivinnuni, sigur hon.

Vegleiðarar hjá Maluni Joensen vóru Ása Johannesen, granskari á Fiskaaling, og Eyðfinn Magnussen, lektari í lívfrøði á Náttúruvísindadeildini. Próvdómari var Kirstin Eliasen, granskari á Fiskaaling.