Danmark: Andstøðan fær eina viku

Teir tríggir flokkarnir í Fólkatinginum SF, Radikalu og Konservativu fáa eina viku at umráða seg í, hvørt teir skulu atkvøða fyri ella ímóti ætlanini hjá stjórnini at strika Dýra Biðidag sum heiligdag.

Verjumálaráðharrin Jakob Ellemann-Jensen hevur nevniliga givið flokkunum til í næstu viku at gera av, um teir vilja vera við ella ikki. Og tað fylgja treytir við. Tí um flokkarnir atkvøða ímóti ætlanini, sleppa teir ikki at vera við í tí stóru verjusemjuni.

Játtanin til verju og trygd skal hækkast, og fíggingin skal sambært donsku stjórnini finnast við at strika ein heiligdag.

Jakob Ellemann-Jensen sigur við Ritzau, at tað er samanhangur ímillum tað at taka ábyrgd av fíggingini av eini nýggjari verjusemju og tað at vera við í samráðingunum um eina nýggja verjusemju.