Marius Ziska, FSO og 2.400 áhoyrarar í sjónvarpinum hjá Kringvarpinum

“Floymandi nærvera” er partur av 40-ára føðingardagsfagnaðinum hjá Symfoniorkestrinum og Norðurlandahúsinum. Konsertirnar verða tríggjar í tali, og eru tær allar standikonsertir.

Kringvarp Føroya tekur konsertina upp, og hon verður send í sjónvarpinum á páskum. 

Arbeitt hevur verið við hesari verkætlanini í góð tvey ár, og sera nógv verður gjørt burtur úr konsertunum. Verkætlanin er partur av strategiini hjá Symfoniorkestrinum at blanda tónleikasjangrur og at røkka fleiri áhoyrarum. 

Í sambandi við konsertina framleiðir forlagið Sprotin eina serliga skrá. Skráin rúmar forteljing um sangskrivaran og tónleikararan Hans Marius Ziska og um teksthøvundin Hans Jacob Kollslíð. Tekstirnir hjá Hans Jacob Kollslíð eru at finna í skránni, og eisini eru løg við nótum og akkordum hjá Marius Ziska.

marius_nyggj_mynd_.png

Marius Ziska. Mynd: Aura Myndir

40 ára fagnaðarverkætlanin

Atli K. Petersen, Magnus Johannesen og Tróndur Bogason hava útsett tónleikin hjá Mariusi Ziska fyri symfoniorkestur. Teir eru allir arrangørar við hollum royndum og teljast millum teir bestu, vit eiga.

Ein serstakur pallur verður bygdur til konsertina, og orkesturuppstillingin verður nakað øðrvísi enn vanliga uppstillingin hjá Symfoniorkestrinum. 

Danin Kent Olsen ljóðblandar hesar tónleikaverðir. Umframt, at Kent er fastur ljóðmaður hjá Mariusi Ziska, tá teir spæla í Danmark, so hevur hann drúgvar royndir at gera ljóð í samansjóðingini av rútmiskum og klassiskum orkestrum.

Súni Joensen er ljóssniðgevi, og ljósparturin er sniðgivin niður í minstu detalju eins og alt annað á konsertini.

2.400 fólk fara at lurta eftir Mariusi Ziska og Føroya Symfoniorkestri 10. og 11. februar, og enn eru nøkur atgongumerki eftir til eykakonsertina, sum verður spæld leygarkvøldið 11. februar kl. 22.30.

Bernharður Wilkinson stjórnar orkestrunum. 

fso_114.jpg