Skerd lið í stórsteypadysti

Tað eru tvey skerd lið, sum sparka fótbóltskappingarárið í gongd við stórsteypadystinum í dag.

Føroyameistararnir úr KÍ spæla uttan millum annað uttan landsliðsspælararnar, Jákup B. Andreasen, Mads Boe Mikkelsen og Heina Vatnsdal, meðan steypavinnararnir úr Víkingi skulu klára seg uttan Sølva Vatnhamar og Jákup Johansen, skrivar bolt.fo.

Hetta hevur við sær, at fleiri ungir spælarar fáa kjansin frá byrjan, t.d. Símun Kalsø hjá KÍ og Árni Nóa Atlason hjá Víkingi. Hesir hava báðir spælt nógv í venjingardystunum í vetur.

Fleiri av nýggju spælarunum hjá KÍ eru eisini við frá byrjan í dag. Vegard Forren, Aketchi Luc-Martin Kessi og málverjin, Markus Olsen Pettersen fáa allir sín fyrsta almenna dyst fyri KÍ.

Ágóðin frá ársins stórsteypadysti fer til felagið HOYR - Felagið fyri hoyribrekað í Føroyum. Tað er Lions Føroyar og Fótbóltssambandið, sum í felag skipa fyri dystinum, sum byrjar klokkan 15.00.