Hádeild í Sankta Frans skúla næsta ár

Tað fer at kosta 28,5 milliónir at byggja nýggja skúlabygningin, sum skal hýsa hádeildini hjá Sankta Frans skúla í Havn.

Tórshavnar kommuna hevur í dag skrivað undir arbeiðstøkusáttmála við byggifelagið HVT. 

Við nýggja bygninginum verður skúlatilboðið hjá Sankta Frans skúla víðkað til at fevna um næmingar í 8. og 9. flokki. Sum nú hevur skúlin bara flokkar upp til sjeynda flokk. 

Seks skúlastovur

Kommunan upplýsir, at í skúlanum verða seks skúlastovur, umframt serhøli og fakhøli, eins og starvsfólkaumstøður og felags uppihaldshøli.

Bygningurin er umleið 1.100 fermetrar og verður bygdur á stykkinum, sum Stella Maris vøggustova stendur á. 

Í næstu viku verður farið at taka Stella Maris-húsini niður.

Miðað verður eftir, at nýggi skúlin er klárur til skúlaárið 2024/25.