Brúktu fyri 13 mió. av kortunum

Bank Nordik hevur hugt eftir, hvussu nógv føroysk kort vórðu brúkt í Berlin í tíðarskeiðnum frá 9. til 17. januar. Tey tølini vísa, at 1.441 viðskiftafólk hjá BankNordik brúktu kortið í Berlin hetta tíðarskeiðið, og talan var um 19.450 kortgjaldingar upp á tilsamans 5 milliónir krónur.

Betri Banki sigur, at teirra tøl eru á leið tey somu sum tey hjá Bank Nordik.

Hesir báðir bankarnir sita á 80 prosentum av føroyska marknaðinum. Leggja vit teirra tøl saman, so er talan um knøpp 3.000 viðskiftafólk og knappar 40 túsund kortgjaldingar upp á tilsamans 10 milliónir krónur.

Leggja vit síðani smærri peningastovnarnar afturat, so er talið á leið 12 til 13 milliónir krónur. Og her skal viðmerkjast, at talan bert er um kortgjaldingar, og talan er ikki um hotellrokningar, flogferðaseðlar og annað, sum er goldið áðrenn fráferð.

Eftir hesum at døma hevur hvør av teimum 5 túsund føroyingunum í miðal brúkt umleið 3.600 krónur í lummapengum í Berlin, og hetta samsvarar sambært bankunum við tað, ið vanliga verður brúkt á eini frítíðarferð.

Á ólavsøku í fjør vóru brúktar umleið 20 milliónir krónur í kortgjaldingum. So munurin á Berlintúrinum og seinastu ólavsøku er umleið 7 milliónir krónur.