Føroyingur í ráðgevandi toymi fyri veðurlagsgransking

Karin Margretha H. Larsen er vald í ráðgevandi toymið fyri veðurlagsgransking, upplýsir Havstovan.

Tað er Nationalt Center for Klimaforskning, NCKF, sum húsast hjá Danmarks Meteorologiske Institut, DMI sum hevur valt 17 limir í nýtt ráðgevandi toymi. 

Eitt føroyskt umboð er í toyminum, og tað er altso Karin Margretha H. Larsen,  sum er havfrøðingur og deildarleiðari á Havstovuni.

Granska og miðla

NCKF, sum varð stovnað í januar 2020, hevur til endamáls at granska og miðla vitan um veðurlagsbroytingar og avleiðingar fyri menniskju og náttúru í ríkisfelagsskapinum. NCKF virkar eisini sum stuðul undir arbeiðinum hjá DMI sum veðurlagsráðgevi hjá donsku stjórnini. 

Granskingin hjá NCKF fevnir víða og er serliga um veðurlagsvitan til tað danska samfelagið og evnir, sum hava týdning fyri ríkisfelagsskapin, gransking í polarum viðurskiftum og globalum veðurlagsmodellum.

Sita í tvey ár

 Nýggja toymið er valt fyri tvey ár, og teir 17 limirnir hava serliga vitan innan veðurlagsbroytingar. Toymið skal kunna um tað, sum rørir seg í samfelagnum, og um avbjóðingar og tørv.