Partabrøvini í Smyril Line verða ikki seld á hesum sinni

Partabrøvini, sum landið eigur í P.f. Smyril Line, verða ikki seld á hesum sinni.

Tað boðar Løgmansskrivstovan frá. 

Í vár fekk løgmaður heimild í fíggjarlógini fyri 2023 at selja partabrøvini, sum landið eigur í P/F Smyril-Line.

Faroe Law, Numo og Kamaradvokaturin, Poul Schmith, vunnu útboðið hjá Løgmansskrivstovuni um at standa fyri søluni.

Mykines, Glyvursnes, Smyril Line

Farmaskipini Mykines og Glyvursnes hjá Smyril Line, sum nú hava fingið eyðkendan lit. (Mynd: Bjarni Árting Rubeksen)

79 milliónir

Landið eigur 16,2 prosent í Smyril Line, og Fíggjarmálaráðið væntaði sambært fíggjarlógini í 2023 at fáa 79 milliónir krónur fyri partabrøvini.

Tilgongdin er nú komin at enda, og niðurstøðan er, at eingin søla verður á hesum sinni av partabrøvunum, sum landið eigur í P/F Smyril Line.

Nakrir keyparar vístu áhuga, men tá samanum kom, fekk landsstýrið einki boð upp á partabrøvini.

Landsstýrið fer í næstum at taka støðu til, hvat víðari skal henda við partabrøvunum, sigur Løgmansskrivstovan.