Navalnyj skuldi býtast um við russiskan leigudrápsmann

Russiski andstøðuleiðarin Aleksej Navalnyj var um at vera latin leysur í býti við annan fanga, áðrenn hann doyði í revsileguni í Sibiria.

Tað siga hjálparfólk hjá Navalnyj sambært Reuters, sum NTB endurgevur.

Navalnyj skuldi býtast um við russiska leigudrápsmannin, Vadim Krasikov, sum situr fongslaður í Týsklandi. Vadim Krasikov er partur av russisku trygdartænastuni FSB, og er fonglsaður fyri lívstíð.

Sambært hjálparfólkunum var eisini tosað um, at tveir amerikanskir ríkisborgarar skuldu vera partur av býtinum.

Tað sigur Maria Pevchikh á upptøku á Youtube-rásini hjá Navalnyj.

Stuðlarnir hjá Navalnyj halda, at russiski forsetin, Valdimir Putin, hevur ábyrgdina av, at Navalnyj er deyður. Hetta hevur amerikanski forsetin, Joe Biden, eisini sagt. 

Russiskir myndugleikar siga seg ikki hava dripið Navalnyj.