Ukraina vil hava føroyingar at gevast við samstarvinum við Russland

- Eg vóni, at vit fáa steðgað henni. 

Tað sigur nýggi ukrainski sendiharrin í Danmark, Andrii Yanevskyi, við danska kringvarpið um júst føroysku fiskivinnuavtaluna við Russland. 

- Eg kann ikki vera fegin um, at nakar handlar við Russland. Tí hvør dollari, evra ella króna, sum russar tjena, verður koyrd í eina krígsmaskinu, og verður til bumbur og rakettir í heimlandi mínum. Sjálvandi eri eg ikki fegin um tað, sigur Andrii Yanevskyi.

Sendiharrin sigur við DR, at hann virkar fyri at sannføra føroyskar myndugleikar um at strika samstarvið.

- Tað er ikki júst tað rætta at gera, at halda fram at samstarva við fólk, sum hótta teg og tíni sameindu. Og sum fremur ræðuleikar og krígsbrotsverk, sigur hann.

Andrii Yanevskyi tók við starvinum sum ukrainskur sendiharri í Danmark í desember í fjør. 

Landsstýrið: Lítil og eingin samhandil

Í skrivligum svari til  danska kringvarpið, sigur landsstýrið:

- Viðvíkjandi spurninginum um fiskivinnusamstarvið, skal havast í huga, at atlit eisini skal takast at einari framhaldandi burðardyggari umsiting av fiskastovnunum í Norðuratlantshavi.

Harumframt verður víst á, at samhandilin við Russland er lítil og eingin. 

- Samhandilin millum Føroyar og Russland er munandi minkaður, og kann uttan iva verða samanborin við minkingina í samhandlinum hjá okkara sameindu við Russland.  

Lagt verður aftrat í svarinum, at Føroyar hava fordømt álopið á Ukraina, og Føroyar stuðla Ukraina.