Óli dagsins maður í Sävehof-hálvfinalusigri

Føroyski hondbóltssnillingurin Óli Mittún gjørdi rættiliga vart við seg í fyrstu hálvfinaluni um svenska meistaraheitið.

Kviki bakspælarin skeyt níggju mál og varð kosin dagsins maður, tá IK Sävehof vann 33-23 á Kristianstad heima í Partille Arena. 

Útiliðið fekk ta betru byrjanina við trimum málum á rað, men eftir at Óli Mittún hevði skotið teir gulsvørtu í gongd var ongantíð nakar ivi, og Sävehof tók fyrsta stykkið.

Áðrenn liðini hittast aftur í aðru hálvfinaluni 26 apríl, hava Óli Mittún og liðfelagarnir risa uppgávu í European League, har Jóhan á Plógv Hansen og Flensburg bíða. Fyrra fjórðingsfinalan verður 23. apríl í Partille.