- Tíðindi, mentan og ítróttur
Skal vera lættari at fáa føroyskar útbúgvingar góðkendar uttanlands
![](https://kvf.fo/sites/default/files/styles/grein-ovasta-mynd/public/djoni_nolsoe_joensen_breddin-denoiseai-denoise.jpg?itok=ktsmIT8L)
Eftir ætlan skulu Føroyar og Fróðskaparsetrið gerast partur av altjóða Bologna-tilgongdini. Men, fyri at tað skal lata seg gera, er fyrsta stigið at samtykkja ein føroyskan førleikakarm.
Tað sigur Djóni Nolsøe Joensen, landsstýrismaður í útbúgvingarmálum. Sambært landsstýrismanninum hevur tað í nógv ár verið ætlanin, at Fróðskaparsetrið skal gerast partur av Bologna-leistinum.
Bologna-leisturin
Sokallaði Bologna-leisturin er eitt slag av evropeiskum samstarvi, sum hevur til endamáls at skapa ein felags karm um hægri útbúgvingar í Evropa.
Endamálið er, at Evropa so at siga verður útbúgvingarliga felags, soleiðis at lesandi og granskarar frítt kunnu flyta seg, lesnaðin og granskingina tvørtur um evropeisku landamørkini.
Førleikakarmurin er eitt fet nærri Bologna
Førleikakarmurin, sum verður veruleiki við ætlaða lógaruppskotinum, er sambært landsstýrismanninum eitt stig leiðini at fáa føroysku útbúgvingarnar góðkendar í altjóða høpi.
- Førleikarkarmurin er við til at lýsa støði á teimum ymsu útbúgvingunum í einari útbúgvingarskipan. Og tað er fyrsta treytin fyri góðkenning í altjóða høpi, sigur landsstýrismaðurin.
Skal lætta um hjá lesandi at sleppa framat útbúgvingum aðrastaðni
Førleikakarmurin skal eisini gera tað lættari hjá lesandi í Føroyum at fáa sína útbúgving góðkenda uttanlands. Sum annars hevur verið ein trupulleiki í summum førum.
Landsstýrismaðurin sigur, at tað eru dømi, har føroysk lesandi ikki eins lættliga eru sloppin framat lesnaði á øðrum lærdum háskúlum. Og sambært landsstýrismanninum skal førleikakarmurin bøta um hetta.
Men fyrst skal uppskotið samtykkjast í løgtinginum. Síðani skulu útbúgvingarnar bólkast, og tað arbeiðið er ikki byrjað enn.
Hoyr samrøðu við Djóna Nolsøe Joensen her: