Verjumálaráðharrar hittast í Havn

Týsdagin verður ein nýggj visjón fyri felags, norðurlendska verjusamstarvið undirskrivað í Havn.

Danmark hevur í ár formansskapin í verjusamstarvinum, sum nevnist NORDEFCO - ein stytting fyri Nordic Defence Cooperation - og sum fevnir um Danmark, Svøríki, Finland, Norra og Ísland.

NORDEFCO varð sett á stovn í 2009, men sambært danska verjumálaráðnum er verjusamstarvið millum norðurlondini økt markant síðani russisku innrásina í Ukraina. 

Endamálið við styrkta samstarvinum er at gera londini betri før fyri at verja seg, og at stuðla undir trygd og støðufesti í Norðurlondum. 

Eisini hava norðurlond sett sær sum mál, at operativa samstarvið skal leggjast til rættis og samskipast betri enn ídag. Norðurlond skulu í størri mun hava felags venjingar og onnur átøk, sum styrkja støðuna hjá NATO.

Nú Danmark hevur formansskapin í NORDEFCO, hevur danski verjumálaráðarrin, Troels Lund Poulsen, bjóða norðurlendsku verjumálaráðharrunum á fund í Føroyum. Harvið eru Danmark og Føroyar vertir í felag, og við á fundinum í Havn verða eisini Høgni Hoydal, landsstýrismaður í uttanríkis- og vinnumálum, og eitt umboð fyri grønlendska landsstýrið.

Til umrøðu á fundinum er trygdarstøðan í Arktis og Norðuratlantshavi, upplýsir danska verjumálaráðið.

Nú Finland og Svøríki bæði eru blivin limir í NATO, skal tað markerast við at orða eina nýggja visjón fyri samstarvið í NORDEFCO, sigur danska verjumálaráðið.

Troels Lund Poulsen hevur bjóðað til tíðindafund á Hotel Hafnia í Havn, fyrrapartin týsdagin. Har skal nýggja visjónin fyri NORDEFCO undirskrivast.

Danski formansskapurin í verjusamstarvinum hevur sett fokus á fýra, verjupolitisk átøk. Tey eru framhaldandi stuðul til Ukraina, menningin av trygdarstøðuni í Arktis, Norðurlantshavi og Norðurlondum, at fáa nýggju visjónina fyri NORDEFCO at virka, og so skulu innanhýsis mannagongdirnar í felagsskapinum endurskoðast.