Verkfallið: Skert virksemi á dagstovnum, og summir lata aftur

Tað er ymiskt, hvussu dagstovnarnir eru raktir av verkfallinum. 

Í Klaksvíkar kommunu verða teir raktir, tí bæði privatur veitari og starvsfólk hjá kommununi hava ábyrgd av reingerð á stovnunum. 

Niels Juel Arge, leiðari á dagstovnaøkinum í kommununi, sigur, at dagstovnarnir steingja ikki, men í næstu viku verður virksemið skert og lagað til støðuna. 

Eysturkommuna

Í Eysturkommunu hava allir dagstovnar opið, og tað vera teir eisini í morgin. 

Ove Heinesen, trivnaðarleiðari í Eysturkommunu, sigur, at kommunan metir um støðuna so hvørt og tekur ein dag í senn.

Fuglafjørður

Í Fuglafjarðar kommunu steingir annar dagstovnurin í dag, tí eingin reingerð er.

Hin dagstovnurin tekur ímóti færri børnum í næstu viku, tí nøkur starvsfólk, sum eru í dagliga arbeiðnum, eru limir í einum av feløgunum, sum eru í verkfalli.

Og triði stovnurin, tað er dagstovnur og frítíðarskúli, steingir í næstu viku, men hevur opið aftur vikuna eftir, tí øll reingerðarfólkini eru ikki limir í fakfelag og arbeiða aðruhvørja viku, sigur Jónhild Abrahamsen, sosialdeildarleiðari í Fuglafjarðar kommunu.

Tvøroyri

Í Tvøroyrar kommunu stongdi vøggustovan í gjár, barnagarðurin steingir í kvøld, og frítíðarskúlin og forskúlin steingja týsdagin í næstu viku, tí reingerðarfólkini eru í verkfalli.