- Tíðindi, mentan og ítróttur
Føroysk epli bert 20% av nýtsluni
![](https://kvf.fo/sites/default/files/styles/grein-ovasta-mynd/public/epli_1.jpg?itok=zjm29Y6q)
Samlaða eplanýtslan í Føroyum er umleið 3.000 tons um árið, og samlaða føroyska framleiðslan av eplum er umleið 600 tons um árið, t.e. umleið 20% av nýtsluni. Skulu tað í Føroyum veltast so mikið nógv epli, at tað dekkar allan tørvin, skulu tað hvørt ár setast niður umleið 430 tons av seteplum.
Tað kemur fram í svari, sum Høgni Hoydal, landsstýrismaður, hevur givið Steffani Klein Poulsen, tingmanni. Í kjalarvørrinum av verkfallinum herfyri spurdi Steffan Klein Poulsen í grein 52a fyrispurningi landsstýrismannin millum annað, hvussu nógv setepli skulu setast niður, fyri at vit gerast sjálvbjargin við eplum í Føroyum.
Tølini skulu takast við fyrivarni, at tey eru 10 ára gomul. Vit hava ikki dagførd tøl um millum annað eplaframleiðslu og -brúk í Føroyum, sigur Høgni Hoydal í svarinum til Steffan Klein Poulsen.
Í svarinum vísir Høgni Hoydal eisini á, at farið er undir at gera ein nýggjan landbúnaðarpolitikk, sum serliga leggur dent á at økja grønmetisframleiðsluna í Føroyum.