Landslæknin tikið boð um Áargarð aftur

Boðini, sum røktarheimið Áargarður á Sandi fekk frá landslæknanum, eru ikki galdandi longur.

Tey standa ikki longur á heimasíðuni hjá landslæknanum.

Sambært heimasíðuni verða boð strikað, tá landslæknin hevur fingið prógvað, at treytirnar í boðunum eru loknar.

24. apríl í ár fekk Áargarður á Sandi boð um at handfara heilivág forsvarliga og hava nøktandi journalføring, sjúkrabøkur, og útvega sær samtykki til røkt og viðgerð, sum byggir á upplýsing.

Landslæknin gjørdi fráboðað eftirlit á Áargarði 7. februar. Hann staðfesti, at heilivágurin var ikki handfarin nóg væl.

Stórur vandi er fyri, at fólk fáa skeivan heilivág, stendur í boðunum til Áargarð. 

Niðurstøðan hjá landslæknanum var, at trygdin hjá teimum, sum eru í Áargarði, er ikki nóg góð, ella sum tað stendur í boðunum, sum eru á donskum, at "samlet set udgør de større problemer af betydning for patientsikkerheden".