Mæla til at seta 53 serlæknar aftrat

Alt ov fáir serlæknar eru í føroyska sjúkrahúsverkinum, og fleiri størv eru eisini ósett

Kortini verður nú mælt til at seta nógv fleiri serlæknar.

Í løtuni eru 68 størv til serlæknar í føroyska sjúkrahúsverkinum. Fleiri av hesum størvum eru ósett, og konsulentar røkja fleiri av hesum uppgávum.

Men talið 68 er alt ov lítið, er niðurstøðan hjá ienum arbeiðsbólki, sum Margit Stóra, landsstýriskvinna, setti at meta um tørvin á serlæknum.

53 aftrat

Arbeiðsbólkurin heldur nevniliga, at talið á serlæknum skal vaksa úr teimum nevndu 68 upp í 121.

Við øðrum orðum skulu 53 serlæknar setast aftrat í sjúkrahúsverkinum.

Hetta er ein næstan vónleys uppgáva, men arbeiðsbólkurin mælir til, at føroyska sjúkrahúsverkið kann bjóða eitt ávíst tal av høvuðsútbúgvingarstørvum út um árið í sergreinum, sum føroyska heilsuverkið hevur tørv á. Í løtuni verður tað gjørt av í Danmark, hvørji útbúgvingarstørv skulu bjóðast út

Tilgongdin at skipa sjúkrahúsverkið sum universitetssjúkrahús fer eisini at hjálpa, heldur arbeiðsbólkurin.

Les tilmælið frá arbeiðsbólkinum her.