Árin á umhvørvið góðkent

Umhvørvisstovan hevur góðkent umhvørvisárinsmetingina, sum SEV hevur gjørt um vindmyllulundina í Klivaløkshaga á Sandi.

SEV ætlar seta upp fimm, seks ella sjey myllur í Klivaløkshaga vestan fyri Sands bygd. 

Staðsetingin er ein lutfalsliga breiður fjallaryggur ella kambur millum Klivarnar og Vørðuna.

Verkætlanin verður boðin út. 

Uppskot er gjørt um atkomuveg, sum ætlandi verður bundin í vegin millum Sand og Skopun, nakað norðan fyri íbindingina frá undirsjóvartunlinum.

Vindmylluvirksemið krevur lendi, sum er 30.000 fermetrar.

Vindmyllur í Sandoynni, Klivaløkshagi á Sandi

Eingin ampi

Sambært árinsmetingini fara vindmyllurnar ikki at vera til ampa, hvørki við óljóði, skuggakasti ella endurskini. 

Myllurnar fara at síggjast úr Sands bygd, frá Gróthúsvatni, frá vegnum til Søltuvíkar og frá lendinum har um vegir. 

Vindmyllurnar kunnu fáa neiligt árin, serliga á búfuglin í økinum, sigur metingin. 

Umhvørvisstovan hevur sett ávísar treytir til SEV og til felagið, sum vinnur útboðið, sum skulu tryggja, at árinini á náttúru og umhvørvi vera minst møgulig, og fylgt verður við gongdini hjá fugli í økinum

Avgerðin hjá Umhvørvisstovuni kann kærast til landsstýriskvinnuna í umhvørvismálum í seinasta lagi 9. august.

Kærurætt hava tey, sum avgerðin hevur ein serstakan, beinleiðis og persónliga týdning fyri.