Søgulig 100 metrar OL-finala við monnum

Olympiska finalan í 100 metra renning hjá monnum í gjár bleiv nakað heilt serligt, tí fyri fyrstu ferð megnaðu allir átta finalistarnir at renna teinin uppá minni enn 10 sekund.

Neyðugt var eisini at hyggja væl og virðiliga eftir málmyndunum, áðrenn tað bleiv staðfest, at amerikanarin Noah Lyles vann við tíðini 9,784.

Kishane Thompson av Jamaika fekk silvur við tíðini 9,789. Fred Kerley úr USA vann bronsu við tíðini 9,81.

OL 2024, 100 metrar renning

Bara 12 hundraðpartar av einum sekundi vóru á muni millum nummar eitt og nummar átta.

Hetta var fyrstu ferð síðan 2004, at ein amerikanskur rennari vann 100 metra finaluna.

Usain Bolt av Jamaika eigur framvegis heimsmetið í 100 metra renning. Tað er 9,58 sekund.

Hann eigur eisini metið í 200 metrum - 19,19 sekund.

OL 2024, 100 metrar renning, Noah Lyles

Roknað verður við, at Noah Lyles hevur betri møguleikar at taka tað metið enn metið á 100 metrum. Lyles er ikki tann besti startarin, men kemur upp í eina øgiliga ferð, og tí er 200 metra teinurin upp aftur betri hjá honum.

Finalan í 200 metrum verður hóskvøldið.