Rýmdi undan politinum og leyp á sjógv

Fólk hevur verið á regatta og ovastevnu um vikuskiftið. Sambært fyriskiparunum av ovastevnu vóru nógv fólk í Nólsoy.

Klokkan 05.30 sigldi Ternan síðstu stevnugestirnar um fjørðin til Havnar.

Veðrið var einki serligt í gjár. Svimjingin um Nólsoyarfjørð var avlýst fyri veður.

Regettasiglingin, sum byrjar á Eiði og plagar at enda í Nólsoy, var eisini skerd av veðrinum, siga fyriskipararnir. Bátarnir vóru ikki so nógvir á ovastevnu í ár.

Sambært politinum hevur verið nokk at gera í nátt.

Í Klaksvík var rok í nátt, sigur vakthavandi á politistøðini. Tveir menn vóru í hornatøkum. Menninir fáa sekt fyri at bróta skilhaldsreglurnar, ella politiviðtøkuna.

Sum vanligt er, hevði politiið fólk í Nólsoy til ovastevnuna.

Har fekk politiið eina fráboðan um herverk og hóttanir. Men tá politiið kemur á staðið, er maðurin, sum er undir illgruna, rýmdur við Ternuni til Havnar. Politiið bíðar eftir manninum á havnarlagnum á Eystaru Bryggju í Havn.

Men tá maðurin skuldi handtakast, loypur hann á sjógv.

Alt spældi kortini væl av, og politiið hevur fingið fatur í manninum. Nú verður málið viðgjørt, um maðurin skal fyri rættin, og um ætlanin er at varðhaldsfongsla hann.

Hugsaði gerningsmaðurin hevði hótt eitt fólk í Nólsoy og brúkt vápn.

Politiið fekk eisini fráboðan um eitt annað harðskapsmál í Nólsoy. Hesa ferð var talan um grovan harðskap og hóttanir.

Politiið sigur seg vita, hvør maðurin er. Hann verður skuldsettur og avhoyrdur seinni í dag.

Eisini skulu vitnir avhoyrast.

Tann, sum maðurin framdi harðskap ímóti, fekk eitt sindur av skaða í andlitið og var ein túr á Landssjúkrahúsinum.

Ferðslukanningar
Ferðslukanningar vóru eisini gjørdar við Norðskála og Oyrabakka fyrrapartin í gjár.

Har fekk ein bilførari klipp fyri at brúka telefon, meðan hann koyrdi.

Revsingin fyri tað er herd. Hon er nú klipp í koyrikortið og 1.500 kr. í sekt.

Ein annar bilførari fekk treytaða frádøming fyri at koyra ov skjótt.