Dylan á føroyskum

Um dagarnar kom Knút við nýggja sanginum, Tá ódnin brestur á. Hetta er tulking av Bob Dylan klassikaranum A Hard Rain's A-Gonna Fall frá '62, ið Rói Patursson umyrkti í 1978.

A Hard Rain´s A-Gonna Fall á The Freewheelin' Bob Dylan er 6.52 til longdar. Tá ódnin brestur á er væl drúgvari. Yvir 9 minuttir til longdar.

Gomlu jukeboksirnar, pláturnar og útvarpsstøðirnar hava helst gjørt sítt til, at poppsangir oftast eru einar tríggjar fýra minuttir til longdar. Talgildingin í dag ger kortini, at vit ikki í sama mun eru bundin at slíkum avmarkingum, heldur Knút.

- Bob Dylan er helst mín yndissangari og sangskrivari, sigur Knút, ið eisini altíð hevur verið hugtikin av umyrkingini hjá Róa Patursson. Hon var gjørd til minnis um rithøvundin Magnus Dam Jacobsen, ið andaðist í 1978.

Rói hevur megnað at flutt hesa stórslignu og dramatisku yrking yvir í eitt føroyskt og staðkent univers.

- Eg havi leingi ynskt at gera eina tulking av føroysku útgávuni og eri sera takksamur fyri tað, sum spurdist burturúr saman við framúr góðum tónleikarum, sangarum og studiotøkningum.