Veljarakanning: Fólkaflokkurin framvegis nógv størsti flokkur

Fólkaflokkurin er framvegis nógv størsti flokkur, sambært nýggjastu veljarakanningini, sum Spyr.fo hevur gjørt fyri Portalin og FM1

Kanningin, sum varð gjørd í gjár, gevur Fólkaflokkinum 34 prosent av atkvøðunum og 12 tingfólk. 

Sambandsflokkurin verður sambært kanningini næststørsti flokkur á tingi. Flokkurin fær 20,4 prosent av atkvøðunum og sjey tingsessir.

Javnaðarflokkurin og Tjóðveldi fáa ávíkavist 16 prosent og 15 prosent av atkvøðunum. Tað gevur fimm løgtingslimir til hvønn flokkin.

Framsókn og Miðflokkurin fáa umleið seks prosent av atkvøðunum og tvey tingfólk í part. 

Samgongan ein lúsing

Sjálvstýri fær heldur ikki í nýggjastu veljarakanningini umboð á ting. Flokkurin fær 2,4 prosent av atkvøðunum. 

Samanumtikið fær samgongan ein lúsing frá veljarunum. Teir tríggir samgonguflokkarnir, sum hava sitið við valdið síðani desember 2022, fáa tilsamans 12 tinglimir.

Teir tríggir andstøðuflokkarnir - Fólkaflokkurin, Sambandsflokkurin og Miðflokkurin - fáa tilsamans 21 tinglimir.

500 fólk vóru spurd í kanningini hjá Spyr.fo, sum varð gjørd fyri Portalin og FM1 í gjár.