Merktu grindahvalirnir ferðast suðureftir

Grindin, ið varð merkt á Klaksvík fyri einum mánaði síðan, ferðast uttan íhald og støðugt suðureftir.

Teinurin, hon hevur ferðast, er 1200 fjórðingar, og hon er nú komin suður á 52. breiddarstig. Ferðin er í miðal tveir fjórðingar um tíman, so hon mest sum damlar suðureftir, skrivar Havstovan.

Merktir grindahvalir

Blá og grøn strika eru hvalirnir, sum vóru merktir á Fuglafirði. Reyð og ljósareyð strika eru hvalirnir, ið vóru merktir á Klaksvík. (Mynd: Havstovan)

Merkta grindin úr Fuglafirði, ið nú hevur verið merkt í hálvan annan mánað, hevur yvirhøvur hildið seg longri norðuri -  í seinastuni mest í hellingini norður av Rockallbankanum.

Seinastu tveir dagarnar hevur hon aftur ferðast norðureftir, og er nú komin norður í dýpið millum Ytra- og Ytstabanka, verður sagt av Havstovuni.