Døgurðarnir kunnu gerast heilsubetri

Hugsa um at býta tallerkin upp í eitt Y. So ert tú longu væl á veg at eta fjølbroytt.

So einfalt kann tað gerast, tá tú roynir at eta fjølbroytt og heilsugott, sambært Elsa Sandberg Nielsen.

Hon er føðslufrøðingur og eigur og rekur fyritøkuna, Matbitin.

Sambært Elsu Sandberg Nielsen eta føroyingar sum heild hampiliga heilsugóðan mat, men skundmiklir gerandisdagar eru ofta við til, at vit ikki eta nóg fjølbroytt. Og ei heldur nóg mikið av grønmeti.

- Vanligt pasta kann víkja fyri fullkornspasta og eisini ber til at ríva ella blenda ymiskt grønmeti í eitt nú kjøtsós. Og hugsa um at eta eftir ælabogans litum, so fært tú allar tær vitaminir og mineralir, sum tær tørvar, sigur Elsa Sandberg Nielsen.

Í morgunsendingini gevur hon góð ráð um gera vanligar døgurðarættir upp á aðrar mátar, og hvusu rættirnir kunnu blíva heilsubetri við smáum tillagingum.