Bjørt skal seta kanningarstjóra

Bjørt Samuelsen, løgtingsforkvinna, fekk í gjár hesa fráboðan frá samgongumeirilutanum í Landsstýrismálanevndini:

"Meirilutin í Landsstýrismálanevndini heitir tí hervið á løgtingsforkvinnuna um at seta kanningarstjóra sambært §38, stk.2 í stýrisskipanarlógini at kanna og geva løgtinginum eina frágreiðing um, hvørt landsstýriskvinnan í umhvørvismálum breyt §5, stk.2 í løgtingslóg um ábyrgd landsstýrisins við tilvitað ella av grovum óksetni at bera løgtinginum skeivar upplýsingar, tá hon á tingsins røðarapalli undir 3. viðgerð av løgtingsmáli 59/2023 tann 2. mai 2024 segði seg ongar ábendingar hava fingið um trupulleikar við langtíðarhaldførinum hjá Bústøðum."

Áheitanin er undirskrivað av Hans Jacob Thomsen, formanni í Landsstýrismálanevndini.

12 dagar frammanundan skrivar Johnhard Klettheyggj, løgtingsstjóri, eitt notat til Landsstýrismálanevndina. Í notatinum, dagfest 10. oktober, skrivar løgtingsstjórin, at eingin orsøk er til at seta ein kanningarstjóra. Til tað er málið ov lítið.

Les eisini: Løgtingsstjórin: Ikki neyðugt at seta kanningarstjóra

Bjørt Samuelsen skal altso - sambært stýrisskipanarlógini - seta ein kanningarstjóra, samstundis sum hennara egna, løgfrøðiliga ráðgeving sigur nei.

-Eg taki avgerðina hjá meirilutanum í landsstýrismálanevndini til eftirtektar, sigur Bjørt Samuelsen.

Hoyr samrøðu við Bjørt Samuelsen:

Landsstýrismálanevndin er í tvíningum í málinum um Ingilín Strøm, landsstýriskvinnu. 

Bárður Nielsen úr Sambandsflokkinum, sum í gjár kom í minniluta í Landsstýrismálanevndini, segði beinanvegin, at andstøðan nú fór at fyrireika eitt uppskot til misálit á landsstýriskvinnuna.

Og í tíðindunum á middegi gjørdu Beinir Johannesen, formaður í Fólkaflokkinum, og Jenis av Rana, formaður í Miðflokkinum greitt, at teir taka undir við misáliti á Ingilín Strøm.

Andstøðuflokkarnir taka ikki undir við at seta ein kanningarstjóra. Teir hava biðið løgmann um sjálvur at loysa landsstýriskvinnuna úr starvi, áðrenn tingfundin í morgin, tá misálit annars verður reist. 

Kringvarpið royndi at fáa eina viðmerking frá Akseli V. Johannesen til útvarpstíðindini í kvøld, men tað eydnaðist ikki.