Moldova: Russisk uppíblanding

Í seinna valumfarinum skulu moldovar velja ímillum sitandi forseta, Maiu Sandu, sum vil knýta landið nærri ES og vesturheiminum, og russiskavinarliga Alexandr Stoianoglo.

Hvørki teirra fekk í fyrra valumfari yvir helvtina av atkvøðunum, so tí gjørdist neyðugt við einum valumfari aftrat.

Allar kanningar benda á, at tað verður øgiliga javnt, men ábendingar hava verið um, at Sandu við teprum meiriluta kann varðveita forsetasessin.

Russar reingja valúrslitið
Myndugleikarnir í Moldova vilja í dag vera við, at teir hava varnast “ógvisliga russiska uppíblanding”.

Tað veit Reuters-tíðindastovan at siga frá Stanislav Secrieru, trygdarráðgeva hjá sitandi forsetanum.

- Talan er um eitt átak, sum hevur góðar møguleikar at reingja valúrslitið, skrivar Secrieru á sosiala pallinum X.

Eisini, tá ið fyrra valumfarið var, komu líknandi skuldsetingar fram lokalt, umframt frá óheftum OSCE-eygleiðarum, men Russland vísir øllum aftur.