Sonja drotning skal hava ein kvikil

Sonja drotning av Noregi skal hava peysmeykara

Tað boðar norska kongshúsið frá í tíðindaskrivi.

Sonja drotning varð um vikuskiftið innløgd á sjúkrahúsið í Lillehammer í eitt samdøgur, tí hon hevði hjartablaktran, og nú er greitt, at hon skal hava ein kvikil.

Hon verður skurðviðgjørd hósdagin og verður innløgd á Rikshospitalet í Oslo í morgin, upplýsir kongshúsið.

Væntandi verður hon innløgd í ein til tveir dagar aftaná skurðviðgerðina.

87 ára gamla drotningin fekk hjartablaktran, tá hon var á skíðferð í Lillehammer, og varð innløgd til nærri kanningar.

Kongshúsið boðar frá, at støðan er ikki álvarslig, og at drotningin hevur tað eftir umstøðunum gott.