USA: Kolumbia tók ímóti útvístum migrantum

Líkt var til, at handilskríggj fór at taka seg upp millum USA og Kolumbia, men Hvítu húsini siga nú, at Kolumbia hevur góðtikið amerikonsku treytirnar, og tollurn er strikaður

Donald Trump, forseti, setti 25 prosent revsitoll á vørur úr Kolumbia, men nú er fráboðaði tollurin strikaður.

Mynd: Reuters/Ritzau Scanpix

Sigrún H. Brend

27.01.2025 - 08:01

Tá ið Kolumbia sýtti fyri at lata eitt amerikanskt hernaðarflogfar við útvístum migrantum seta seg, setti Donald Trump, forseti alt fyri eitt 25 prosent revsitoll á vørur úr Kolumbia.

Kolumbia svaraði aftur við sínum tolli, men slakaði seinni, sigur USA.

Nakrar tímar eftir at londini høvdu staðið stinn móti hvørjum øðrum, siga Hvítu húsini at Kolumbia góðtók amerikonsku treytirnar og tók ímóti ólógligum kolumbiskum migrantum úr USA.

Fráboðaði tollurin var strikaður, men amerikanarar siga, at nøkur revsitiltøk framvegis eru í gildi móti Kolumbia.

Kolumbiski uttanríkisráðharrin, Luis Gilberto Murillo, fer nú til Washington DC í sambandi við avtaluna við USA.

- Vit fara framhaldandi at taka ímóti kolumbum, sum eru útvístir og venda heimaftur, og at teir fáa sámiligar umstøður sum borgarar við rættindum, skrivar kolumbiska uttanríkisráðið í morgun.