Flogbóltssamband Føroya sett italskan venjara

Flogbóltssamband Føroya hevur sett 40 ára gamla Ciro Zoratti í starv sum venjara.

Italiumaðurin, sum skal standa fyri menningar- og landsliðsarbeiðnum í Føroyum, men fer eisini at hjálpa føroysku flogbóltsfeløgunum, skrivar Flogbóltssambandið.

Ciro Zoratti hevur hægstu venjaraútbúgvingar frá italska flogbóltssambandinum, CEV og FIVB. Umframt hetta hevur Ciro umfatandi royndir frá altjóða flogbólti á hægsta stigi og við menning av ungum leikarum.

 - Fyri Flogbóltssamband Føroya hevur tað verið umráðandi at flyta landsliðsarbeiðið fyri U-landsliðini og eisini fyri A-landsliðini upp á hægri stig. At seta ein fulltíðarvenjara við royndum sum Ciro, er eitt stig á leiðini, sigur formaðurin í FBF, Peter Holm.

Ciro Zoratti hevur fyrr verið venjari og ítróttastjóri í fleiri av bestu ungdómsfeløgunum í Italia, har hansara høvuðsuppgáva var at menna spælarar til italsku landsliðini. Í 2018 var Ciro Zoratti valdur til besta ungdómsvenjara í Italia. Hann hevur eisini verið høvuðsvenjari fyri kvinnulið í næstbestu italsku deildini og hjálparvenjari í bestu italsku og fronsku deildini fyri kvinnur.

Stuðul frá FIVB, altjóða flogbóltssamgonguni, ger, at tað ber til hjá FBF at seta ein venjara sum Ciro Zoratti í starv.