Hakkaraálopið kostaði Klaksvíkar kommunu fleiri milliónir

Hakkaraálopið á Klaksvíkar kommunu í september í fjør kostaði kommununi fleiri milliónir krónur tilsamans, tá ið teldusníkar løgdu hald á allar telduskipanir hjá kommununi, og eisini hjá Norðoya bú- og heimatænastu og Barnaverndartænastuni í Norðoyggjum.

Talan var um navn, bústað, p-tal, kontunummur, yrkisfelagsligt tilknýti og persónupplýsingar í sambandi við málsviðgerðir.

Kommunan rindaði góðar 800.000 krónur í loysigjaldi fyri at fáa atgongd til sínar dáturnar aftur, og fyri nýggjan pall til útgerð.  

Sambært Frihedsbrevet kostaði álopið kommununi 4,3 milliónir krónur.

Fíggjarnevndin játtaði 4,8 milliónir krónur til at dekka útreiðslur og loysigjald.

Serfrøðingar uttanlands hava staðfest, hvussu hakkararnir sluppu framat upplýsingunum á tann hátt, at starvsfólk í kommununi hevði loggað seg inn á skipanina heimaífrá. Tað ber ikki til longur, sigur borgarstjórin.

Klaksvíkar kommuna hevur gjørt avtalu við útlendska veitara, sum alt samdøgrið hevur eftirlit við trygdini í sambandi við kt-skipanina.

Hoyr innslag í útvarpstíðindunum á nátturða: