Prestur skrivar barnabók

Debora, Hulda, Sára, Rebekka, Rakul og Lea.

Hetta eru nøvnini á nøkrum av kvinnunum, sum til ber at lesa um í Bíbliuni.

Men ikki nógv er skrivað um tær og ei heldur fylla tær nakað serligt í teimum ymisku bíbliusøgunum og barnabíblium.

Tí ætlar presturin, Maria Jørdal Niclasen, at skriva eina barnabók, ið snýr seg um júst kvinnurnar í Bíbliuni.

- Vit lesa nógv heima, eisini bíbliusøgur og barnabíbliur, og tað slóð meg, at har mangla nakrar søgur. Tað eru nógvar góðar og spennandi søgur at lesa, men næstan allar eru um menninar, sigur Maria Jørdal Niclasen, ið saman við manni sínum eigur tvær gentur.

Hon heldur, at tað er tørvur á eini barnabók um kvinnurnar í Bíbliuni.

- Eg havi hugsað, at mann átti at lýst hesar kvinnurnar betur fyri børnunum. Tað hevði givið børnunum eina ríkari uppliving av teimum nógvu bíbliusøgunum, um tey fingu eitt breiðari innlit, sigur Maria Jørdal Niclasen.

Lestrarfarloyvið hjá Mariu Jørðdal Niclasen er til 1. mai, og væntandi er hon komin so væl áleiðis við grundarlagnum fyri bókina, at bókin møguliga kann gevast út seinni í hesum árinum.