Tíðin á gulu súkkluni gevur meining

Gulu, eyðkendu súkklurnar verða komandi tíðina alsamt meira at síggja kring landið.

Fyri 12 ferð er føroyska súkkluliðið, Team Rynkeby Føroyar, farið undir fyrireikingarnar at súkkla til París og savna pengar til børn við álvarsamum sjúkum og familjur teirra.

Beinta Hoydal Joensen er ein av nýggju súkklarunum, sum eru á liðnum hesaferð.

Júst endamálið hjá Rynkeby er nakað, sum Beinta Hoydal Joensen hugsar nógv um.

- Eg havi eina grund til at hava hug  at vera við í Rynkeby. Elsta dóttirin fekk krabbamein fyri 25 árum síðani. Talan var um eitt slag, sum børn millum null og trý ár fáa. Tað var gransking og annað, sum gjørdi, at viðgerðin var øgiliga góð, og tí hava vit eina sólskinssøgu heima hjá okkum í dag, sigur Beinta Hoydal Joensen, sum í tveimum umførum hevur søkt um at sleppa við á føroyska súkkluliðið. 

Fyri Beintu Hoydal Joensen hevur tað stóran týdning, at hon í ár er partur av Team Rynkeby Føroyum.

- Tá eg í dag síggi mína dóttir, sum var sjúk, hvussu væl hon klárar seg, so vil eg so gjarna geva nakað aftur, sigur Beinta Hoydal Joensen.