- Tit síggja ikki ta gleðina, sum vit síggja!

– Vit mugu møta teimum, har tey eru, og vera har fyri tey, eisini tá tað gongur illa.

Í dokumentarsendingini "Leivur vil liva" fáa vit innlit í lívið hjá einum manni, sum stríðist við rúsevnismisnýtslu. Men vit møta eisini starvsfólkunum, sum eru rundan um hann.

Tvær teirra eru Sonja Tungá, heilsuhjálpari, og Beinta Henriksen, sjúkrarøktarfrøðingur, sum báðar arbeiða á Herberginum í Havn.

Í morgunsendingini greiddu tær frá einum arbeiðsdegi, har tað fyrst og fremst snýr seg um at møta menniskjum við virðing, umsorgan og tolsemi.

Hóast arbeiðið viðhvørt kann vera tungt, er gerandisdagurin á Herberginum eisini merktur av hugna og gleði. Ein føðingardagur við flaggi og køku ella ein góður døgurði kann hava stóran týdning.

Arbeiðið hevur eisini lært tær, hvussu skroypiligt lívið er, og hvussu lítið viðhvørt skal til, áðrenn eitt menniskja missir fótafestið.

– Fólk kenna ikki søguna aftanfyri, siga tær.

Hoyr samrøðuna við Sonju Tungá og Beintu Henriksen um lívið á Herberginum, um vón og vónloysi og um at síggja menniskjað aftan fyri trupulleikarnar.