Umstríddur DR-dokumentarfilmur verður vístur í Nuuk

Nógv kjak hevur staðist av DR-dokumentarfilminum "Orsugiak - Hvíta Gullið", men hóast DR hevur tikið dokumentarin av aftur, so verður filmurin nú vístur í Grønlandi.

Dokumentarfilmurin verður vístur við grønlendskum undirteksti.

Tað sigur stjórin í Katuaq, Ivaaq Kriegel, við grønlendska miðilin Sermitsiaq.

- Vit hava øll loyvi frá eigaranum at vísa heimildarfilmin. Vit vilja fáa grønlendsktmælta fólkið við og tryggja, at tey fáa møguleika at síggja og skilja filmin, sigur hann.

Tá heimildarfilmurin kom út, vóru grønlendsku undirtekstirnir ikki klárir, sigur Ivaaq Kriegel við Sermitsiaq. Tí bar ikki til hjá øllum grønlendingum at fylgja við í dokumentarfilminum.

Stjórin í Katuaq vónar, at sýningin fer at skapa eina breiðari fatan millum grønlendska fólkið, soleiðis at tey eisini kunnu luttaka í kjakinum um tað, sigur Ivaaq Kriegel.

Grønlandsdokumentarurin, sum kom út tann 9. februar, er síðan tikin av aftur av DR, og tað hendi mikudagin.