Sturgeon ikki longur undir illgruna fyri at hava snýtt SNP

Fyrrverandi skotski stjórnarleiðarin, Nicola Sturgeon, og fyrrverandi kassameistarin í flokkinum, Colin Beattie, eru ikki longur undir illgruna fyri at hava snýtt skotska loysingarflokkin, SNP, fyri umleið 600.000 pund - ella góðar fimm milliónir krónur. 

Tað skrivar Danmarks Radio við Reuters-tíðindastovuni sum keldu. 

Skotska løgreglan hevur síðani 2021 kannað, hvat er vorðið av pengunum, sum flokkurin hevur fingið frá fólki, sum stuðlaðu loysingarflokkinum. 

Illgruni hevur verið um, at Nicola Sturgeon og maður hennara, Peter Murrell, hava brúkt pengarnar privat. 

Peter Murrell, sum var umsitingarleiðari hjá flokkinum, varð handtikin í apríl í 2023, og tveir mánaðir seinni varð kona hansara eisini handtikin. Kassameistarin í flokkinum, Colin Beattie, varð eisini handtikin í apríl 2023. 

Í dag hevur løgreglan upplýst, at tvey fólk eru latin leys, og tað merkir, at tað nú bara er Peter Murrell, sum er undir illgruna.