Elin og Silja í uppskoti at fáa virðisløn frá Norðurlandaráðnum

Elin á Rógvi og Silja Eystberg eru í uppskoti til barna- og ungdómsvirðisløn Norðurlandaráðsins. Tað eru tær fyri skaldsøguna "Fornt," sum kom út í november í fjør. 

Skaldsøgan viðger tað flótandi markamótið millum veruleika, telduspøl og føroyskar sagnir. Hon leiðir lesaran inn í ein virtuellan fantasiheim við nógvum spenningi og undurfullum sagnarverum, har 11 ára gamli Eiri og vinkonan Sólja varnast eina nýggja veru í virtuella fantasiheiminum. Elin á Rógvi hevur skrivað, og Silja Eystberg hevur myndprýtt.

Skaldsøgan Fornt er í uppskoti saman við 13 øðrum barna- og ungdómsbókum úr Danmark, Finnlandi, Grønlandi, Íslandi, Norra, Svøríki, Álandi og samiska máløkinum. 

Norðurlandaráðið og bøkur

14 bøkur eru í uppskoti at fáa barna- og ungdómsvirðisløn Norðurlandaráðsins í ár. 

Kunngjørt 21. oktober

21.oktober verður vinnarin av barna- og ungdómsvirðisløn Norðurlandaráðsins almannakunngjørdur. Vinnarin verður heiraður á ársfundinum hjá Norðurlendska Ráðharraráðnum 28. oktober. Virðislønin er 300.000 krónur.

Virðislønin er latin síðani 2013. Hon verður latin fagurbókmentum, skrivað til børn og ung, á einum av norðurlendsku málunum. 

Um virðislønina hjá Norðurlandaráðnum stendur, at "Verkið kann vera ein samanrenning av teksti og myndum, og skal lúka høg bókmentalig og listalig krøv."

Í august í fjør vann Elin á Rógvi barna- og ungdómsbókmentavirðisløn Útnorðurráðsins fyri barnaskaldsøguna "Flytifuglar."