Onnur hvør bók er týdd

Onnur hvør bók, sum Nám gevur út, er týdd.

Seinastu fimm árini hevur Nám givið út 20 bøkur um árið.

Umleið helvtin eru týðingar.

Bókadeild Føroya lærarafelags gevur út 65-70 týddar bøkur út um árið.

Djóni Nolsøe Joensen, landsstýrismaður, hevur svarað Honnu Jensen, løgtingskvinnu, sum spurdi um týðingar.

407.000 kr. at keypa rættindi

Í 2024 brúkti Bókadeildin 406.700 kr. til at keypa rættindi og prentfílur og 363.145 kr. til teirra, sum týða.

Einki neyvt tal er um, hvussu nógv Nám hevur brúkt til týðingar.

Týðing er ikki eitt endamál í sær sjálvum hjá Námi, sum ger mest upprunatilfar, svarar landsstýrismaðurin.

Á Fróðskaparsetrinum ber til at taka skeið í týðing. 

Annars verður ikki gjørd nøkur útbúgving í týðing, sigur Djóni Nolsøe Joensen.