Nú er Friedrich Merz nýggjur kanslari í Týsklandi

Friedrich Merz er nýggjur kanslari í Týsklandi. 

Tað hendi hóast hann fyrr í dag sum tað fyrsta kanslaravalevnið nakrantíð ikki varð valdur longu í fyrsta umfari. Hann skuldi brúka 316 atkvøður, men fekk bara 310, og tað kom púra óvart á.

Tá fyrsta umfar var liðugt, var ógreitt, um tað í heila tikið bar til at hava eitt nýtt valumfar í dag.

Men eftir kreppufund í Samveldistinginum komu partarnir til ta niðurstøðu, at annað umfar kundi haldast í dag, og so fór tingið aftur til arbeiðis, fyrst til orðaskifti og síðan at atkvøða.

Og nú er so greitt, at Friedrich Merz, sum er formaður fyri CDU/CSU, verður næsti samveldiskanslari í Týsklandi. Í øðrum valumfari fekk hann 325 atkvøður, meðan 289 atkvøddu ímóti honum. Ein atkvøða var blonk.

Friedrich Merz

Mynd: Ritzau/Scanpix

Friedrich Merz tekur við eftir Olaf Scholz og skal leiða samgongustjórnina við SPD, sum átti kanslaran áðrenn valið, sum var í Týskalndi í februar. Tá fekk CDU/CSU 28,5 prosent av atkvøðunum, og SPD fekk 16,4 prosent.

Eftir ósigurin í fyrsta umfari var gitt um, hvør orsøkin til úrslitið mundi vera, og millum møguleikarnar vóru, at Merz hevur slakað fyri skuldarbremsuni, sum Angela Merkel kom við í síni tíð, og sum setir avmarkingar fyri, hvussu nógvar pengar tað almenna kann brúka.

Ein onnur orsøk kann vera, at Merz áðrenn týska valið atkvøddi saman við høgraflokkinum Alternative für Deutschland, ella AfD, um at herða reglurnar fyri innferðarloyvi til Týsklands.

Beint eftir fyrra valumfar segði Alice Weidel, forkvinna í AfD, at Merz átti at leggja frá sær. Hon skrivaði á X, at atkvøðugreiðslan vísti, hvussu tunt grundarlagið undir nýggju stjórnini er, og at nýval átti at vera sum skjótast. 

Men so var ikki, tí Merz er nú samveldiskanslari í Týsklandi.

Friedrich Merz

Mynd: Ritzau/Scanpix